काठमाडौँ । आज असार १५ अर्थात धान दिवस । दिवसका अवसरमा विभिन्न स्थानमा रोपाइँ गरेर दिवस मनाइएको छ । मानो रोपेर मुरी फलाउने महिनाका रुपमा परिचित असार १५ लाई उत्सवको रुपमा परम्परादेखि नै मनाउने चलन छ ।
नेपालमा बर्खे धान र चैते धान गरी दुई थरीको धानखेती हुने गरेको भए पनि कूल धान उत्पादन हुने क्षेत्रफलमध्ये करिब सात प्रतिशत जमिनमा मात्र चैते धानको खेती हुने गरेको छ । धान दिवसको उपलक्ष्यमा राष्ट्रपति भवन शीतल निवासमा पनि रोपाइँ गरिएको छ ।
आइतबार राष्ट्रपति कार्यालयद्वारा आयोजित रोपाइँ कार्यक्रममा राष्ट्रपति रामचन्द्र पौडेल, प्रथम महिला सविता पौडेल सहभागी हुनुहुन्थ्यो ।
रोपाइँ शुभारम्भ गर्दै राष्ट्रपति पौडेलले कृषिलाई आधुनिकीकरण गर्दै जीवन निर्वाहको आधार मात्र नभएर व्यवसायिक बनाउनुपर्ने बताउनुभयो ।
कृषिलगायत सबै खाले श्रमको सम्मानको संस्कृति र धान उत्पादनमा प्रोत्साहन दिन आफू प्रतिकात्मक रुपमा रोपाइँमा सहभागी भएको राष्ट्रपतिको भनाइ रहेको थियो ।
त्यस्तै राष्ट्रपति पौडेलले कृषि पेशामा निर्भर भइ कृषिलाई रोजगारीको आधारस्तम्भको रुपमा परिचित गराउन अग्रसर कृषकहरूलाई अन्नदाताका रूपमा सम्मान गर्नुपर्नेमा जोड दिनुभएको छ ।
